पालिकाभरि स्वास्थ्य शिविरको तयारी गर्न स्वास्थ्यकर्मी लाई नगर प्रमुखकाे निर्देशन

 

‎

अछाम । पञ्चदेवल विनायक नगरपालिकाका नगर प्रमुख अम्बिका चलाउनेले पालिकाभरि विभिन्न स्वास्थ्य शिविर सञ्चालन गरिने घोषणा गरेकी छन्।

‎

‎पालिका स्तरीय स्वास्थ्य क्षेत्रको अर्धवार्षिक समीक्षा कार्यक्रममा बोल्दै उनले स्वास्थ्य क्षेत्रलाई अत्यन्त संवेदनशील मान्दै नगरपालिकाले यस क्षेत्रमा सबैभन्दा बढी बजेट विनियोजन गरेको बताइन्।

‎

‎उनले निकट भविष्यमा विभिन्न स्थानमा स्वास्थ्य शिविर सञ्चालन गरिने जानकारी दिँदै त्यसका लागि सम्पूर्ण स्वास्थ्यकर्मीलाई तयारी अवस्थामा रहन निर्देशन समेत दिइन्।

‎

‎कार्यक्रममा नगर प्रमुख चलाउनेले स्वास्थ्यकर्मीहरूको व्यवहारप्रति जनस्तरबाट गुनासो आउने गरेको उल्लेख गर्दै सेवा प्रवाहलाई थप प्रभावकारी र सेवामुखी बनाउन आग्रह गरिन्।

‎

‎उनले जिल्लाभरका अन्य स्थानीय तहको तुलनामा पञ्चदेवल विनायक नगरपालिका स्वास्थ्य सेवा प्रवाहमा अग्रणी रहेको दाबी समेत गरिन्।

‎

‎दुई दिनसम्म सञ्चालन भएको उक्त समीक्षा कार्यक्रम बुधबारदेखि सुरु भई बिहीबार नगरपालिकाको सभा हलमा सम्पन्न भएको हो।

‎

‎आर्थिक वर्ष २०८२/०८३ अन्तर्गत सञ्चालन भएका स्वास्थ्य कार्यक्रमहरूको प्रगति समीक्षा, सेवा प्रवाहको प्रस्तुतीकरण तथा छलफल कार्यक्रमको मुख्य आकर्षण रहेको थियो।

‎

‎पालिकाभरिका स्वास्थ्य संस्था, आयुर्वेद सेवा केन्द्र, RUSG कार्यक्रम तथा आँखा उपचार केन्द्रले प्रदान गरेका सेवाहरूको समीक्षा गरिएको स्वास्थ्य शाखा प्रमुख जनक बहादुर बुढाले जानकारी दिए।

‎कार्यक्रममा स्वास्थ्य सेवा सुधार, पहुँच विस्तार र गुणस्तर अभिवृद्धि गर्ने विषयमा व्यापक छलफल समेत भएको थियो।