पञ्चदेवल विनायक नगरपालिकामा सम्पन्न खानेपानी आयोजनाको अमेरिकी राजदूतद्वारा उद्घाटन

अछाम । नेपालका लागी अमेरिकी राजदूत डिन थम्पसनले पञ्चदेवल विनायक नगरपालिका वडा नम्बर १ कुईका मा सम्पन्न भएको खानेपानी आयोजनाको उद्घाटन गरेका छन् ।

पञ्चदेवल विनायक नगरपालिका र USAID कर्णाली जल परियोजनाको साझेदारीमा सम्पन्न भएको ढीमढीमे खानेपानी तथा सरसफाइ आयोजनाको राजदूत डिन थम्पसनले औपचारिक रूपमा रिबन काटेर र धारामा पानी खेलेर उद्घाटन गरेका हुन् । उद्घाटनपछि उनले आयोजनाका लाभग्राहीहरूसँग अन्तरक्रिया गर्दै आयोजना सम्पन्न गर्दा भोगिएका चुनौतीहरू र यसले स्थानीय समुदायमा पुर्‍याएको फाइदाबारे छलफल गरेका थिए। सहभागीहरूले आयोजनाले खानेपानी र सरसफाइ समस्याको समाधान गर्न महत्त्वपूर्ण योगदान दिएकोमा खुसी व्यक्त गरेका थिए । यस्तै राजदूतले पनि समुदायमा यस्तो सकारात्मक परिवर्तन ल्याउने योजनाको हिस्सा बन्न पाउँदा खुसी व्यक्त गरे ।

पञ्चदेवल विनायक नगरपालिकाको आयोजनामा भएको औपचारिक कार्यक्रमको अध्यक्षता नगरप्रमुख अम्बिका चलाउनेले गरेकी थिइन् । प्रमुख अतिथिका रूपमा नेपालका लागी अमेरिकी राजदूत डिन थम्पसन र विशिष्ट अतिथिमा, उनकी धर्मपत्नी जेन थम्पसन, साथै USAID की मिसन डाइरेक्टर केट एडलिन सहभागी थिए । नगरप्रमुख चलाउनेले प्रमुख अतिथि र विशिष्ट अतिथिहरूलाई खादा, माला, र ढाका टोपीले स्वागत गरेकि थिइन् ।

नगर प्रमुख चलाउनेले परियोजनाले स्थानीय समुदायलाई शुद्ध खानेपानी र सरसफाइको सुविधा पुर्‍याएको बताउँदै, दीर्घकालीन रूपमा यसको मर्मत सम्भारको जिम्मा नगरपालिकाले लिने उल्लेख गरिन् । उनले नगरपालिका र USAID कर्णाली जल परियोजनाको सहकार्यमा हाल नगरपालिकामा ३ वटा खानेपानी आयोजना मार्फत "एक घर, एक धारा" योजना सफलतापूर्वक सम्पन्न भइसकेको खुसी व्यक्त गर्दै आगामी दिनमा पनि नगरपालिकाका सबै वडामा खानेपानी, सरसफाइ, स्वास्थ्य, र शिक्षाको क्षेत्रमा USAID  सँग सहकार्य गर्न तयार रहेको प्रतिबद्धता समेत व्यक्त गरिन् ।

स्वागत मन्तव्य राख्दै नगर उपप्रमुख हर्कबहादुर रावलले यस आयोजनाले खानेपानी तथा सरसफाइको समस्याको समाधान गर्नुका साथै समुदायको जीवन स्तरमा सकारात्मक प्रभाव पार्ने विश्वास व्यक्त गरे ।

यस खानेपानी आयोजनाको कार्यान्वयनको जिम्मा डडेलधुराको एमपीडीएसले लिएको थियो भने यो योजना मार्फत कुईकामा ७९ वटा मिटर सहितका धारा जडान गरिएको छ ।

नगरपालिकाको वडा नम्बर १ का ७८ घरधुरी र १ विद्यालयलाई प्रत्यक्ष रूपमा लाभान्वित गरेको यो आयोजना स्थानीय समुदायको जीवनस्तर सुधार गर्न र खानेपानी तथा सरसफाइको पहुँचलाई सुदृढ गर्न महत्त्वपूर्ण मानिएको छ ।

कार्यक्रममा नगरपालिकाका ९ वटै वडाका वडा अध्यक्षहरू, कार्यपालिका सदस्यहरू, नगरपालिकाका कर्मचारीहरू USAID का प्रतिनिधिहरू, पत्रकारहरू, सहित स्थानीय नागरिकहरूको उल्लेख्य उपस्थिति रहेको थियो ।

कार्यक्रमको समापनमा नगरप्रमुख चलाउनेले प्रमुख अतिथि, विशिष्ट अतिथिहरू, र अन्य अतिथिहरूलाई मायाको चिनो हस्तन्त्रण गरेकी थिइन् । उद्घाटन कार्यक्रमको सञ्चालन नगरपालिकाका रोजगार संयोजक भरत अधिकारीले गरेका थिए ।