बिद्यामन्दिरमा विद्यालय व्यवस्थापन समिति गठन प्रक्रिया फेरि अनिश्चित

अछाम । पञ्चदेवल विनायक नगरपालिका–३ स्थित विद्यामन्दिर नमुना माध्यमिक विद्यालयमा विद्यालय व्यवस्थापन समिति गठनको प्रक्रिया फेरि अनिश्चित बनेको छ ।
विद्यालयमा अभिभावकले शुक्रबार तालाबन्दी गरेपछि व्यवस्थापन समिति गठनका लागि बिहीबार बोलाइएको बैठकमा समितिका तीन सदस्यले राजीनामा दिएपछि गठन प्रक्रिया थप अन्योलमा परेको हो ।
समितिका सदस्यहरू रणबहादुर कडायत, सुरेन्द्रकुमार शाही र शरला ढकालले बैठकमा राजीनामा दिएपछि नयाँ व्यवस्थापन समिति गठन गर्ने प्रक्रिया अघि बढ्न नसकेको जनाइएको छ ।
विद्यालय व्यवस्थापन समिति गठनका लागि शनिबार बिहान बोलाइएको बैठकको अध्यक्षता समितिका ज्येष्ठ सदस्य तथा पञ्चदेवल विनायक नगरपालिका–३ का वडाध्यक्ष बजिर शाहीले गरेका थिए ।
विद्यालय विगत आठ महिनादेखि व्यवस्थापन समितिविहीन रहेको छ । लामो समयदेखि समिति गठन हुन नसकेपछि अभिभावक तथा सरोकारवालाबीच असन्तुष्टि बढ्दै गएको थियो ।

बिहिबार अभिभावकहरूले विद्यालयमा तालाबन्दी गरेपछि समिति गठनका लागि प्रक्रिया अघि बढाउने प्रयास गरिएको थियो । तर बैठकमा तीन सदस्यले राजीनामा दिएपछि व्यवस्थापन समिति गठनको प्रक्रिया पुनः रोकिएको हो ।
विद्यालय व्यवस्थापन समिति गठनमा देखिएको विवादका कारण विद्यालयको नियमित प्रशासनिक तथा शैक्षिक व्यवस्थापनमा समेत असर पर्न सक्ने भन्दै अभिभावक तथा सरोकारवालाले तत्काल सहमतिको वातावरण बनाउनुपर्ने बताएका छन् ।