घरेलु मदिरा ब्राण्डिङ गर्दै पञ्चदेवल विनायक

अछाम । पञ्चदेवल विनायक नगरपालिकाले स्थानीय घरेलु मदिरालाई ब्रान्डिङ गर्ने भएको छ । घरेलु मदिरा उत्पादन,नियन्त्रण,व्यवस्थापन तथा नियमन ऐन १४औँ नगर सभाबाट पारित गरेको नगरपालिकाका रोजगार संयोजक भरतराज अधिकारीले जानकारी दिए ।

स्थानीय स्तरमा उत्पादन हुने कोदो,मकै,जौ लगायत अन्य फलफूलको मदिरालाई गुणस्तर मापन गरी ब्रान्डिङ गर्ने गरी ऐन तयार पारी पारित गरिएको हो  । 

ऐन नगर सभाबाट पारित भइसकेकाले अब नियमावली र कार्यविधि बनाएर अन्य कार्य अगाडी बढाइने उहाँको भनाइ छ । नगरपालिकाले तयार गरेको ऐन विपरीत घरेलु मदिरा बिक्री वितरण गर्ने र उत्पादन गरे एक लाखसम्म जरिवाना गर्न सक्ने ऐनमा उल्लेख गरिएको छ ।

अहिले पनि गाउँमा घरेलु मदिराका भट्टीहरू चलेको भन्दै तिनीहरूलाई वैधानिक रूपमा दर्ता गरी कानुनी दायरामा ल्याएर साना उद्योगको रूपमा सञ्चालन गर्ने र उनीहरूलाई व्यावसायिक बनाउने नगरपालिकाका प्रमुख  अम्बिका चलाउनेले बताइन् ।

पालिकाभित्र जनजाति बस्ती धेरै भएको भन्दै जन्म देखि मृत्युसम्मका लागि मदिराको संस्कार पनि रहेकाले यसलाई व्यवस्थापन गर्न ऐन जारी गरिएको उहाँको दाबी छ । 

ऐन लागु भए पश्चात् लुकीछिपी मदिरा बिक्री वितरणमा कमी आउने र दर्ता प्रक्रियामा आएपछि करको दायरा पनि बढ्ने नगर उपप्रमुख हर्क बहादुर रावलले बताए। ऐन कार्यान्वयनमा आउँदा स्थानीय स्तरमा रोजगारी समेत बढ्ने उनको विश्वास छ ।